Plantun de Prouvènço

Pèr coumpara dos planto d'encò nostre

Carex remota & Rosa dumalis

Queirello(-à-espigueto-escartado)

Carex remota

Cyperaceae

Àutri noum : Moutouso, Sagneto.

Nom en français : Laîche à épis espacés.

Descripcioun :
Aquesto queirello trachis dins li bos umide e en ribo d'aigo pulèu sus sòu séusous. I'a pas trop pèr s'engana que se recounèis pulèu eisadamen emé sis pichòtis espigueto de 4 à 8 mm escartado (de 5 à 20 cm) long de la cambo. Lis utriculo de 2,5 à 3,5 mm soun d'un verd jaunas.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 20 à 60 cm
Fueio : costo paralèlo
Tipe bioulougico : Emicriptoufite
Cicle bioulougico : Planto renadivo

Gènre : Carex
Famiho : Cyperaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 4 à 8 mm
Flourido : Printèms - Estiéu

Sòu : Si (Ca)
Autour basso e auto : 0 à 1300 m
Aparado : Noun
Mai à juliet

Liò : Ribiero - Bos umide - Lauroun
Estànci : Termoumediterran à Mountagnard
Couroulougi : Éuropo-Caucasiano
Ref. sc. : Carex remota L., 1755

Agufié(-roso)

Rosa dumalis

Rosaceae

Àutri noum : Agoulencié, Agrufié, Agoulancié, Grato-quiéu, Tapo-cuou.

Nom en français : Églantier commun.

Descripcioun :
Aquel agufié, Rosa dumalis, trachis dins li relarg mountagnous e roucaious. Douno d'èr à Rosa canina, mai èi bèn mens coumun. Èi mai rabasset, emé de fueio souvènt verdalo e de flour pus acoulourido, roso vivo. La diferènci founso èi de vèire dóu coustat de l'ourifice calicinau qu'èi mai grand (>1/4 de la larjour, vèire la fotò). Aquel agufié-roso, presenta aqui èi Rosa dumalis s.s. (sènso glando sus lou pecou, dènt di fueioun coumpausado e sènso péu souto li fueio).

Usanço :
Tóuti lis agufié fan de fru (grato-cuou, agoulènço...), riche en vitamino C e anti-enflamatiéu, que soun bon à manja, majamen en counfituro.